Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ассаламу алайкум ва рaҳматуллоҳи ва баракотуҳ!
Аллоҳнинг ёрдами билан www.muslimaat.uz сайти билан ҳамкорликда «Муслиманинг кундалиги» дастурини сиз, азизларга ҳавола қилдик.
Муҳтарам опа сингиллар! Ушбу дастур сизга нафақат кундалик ишларингизни тартиблашда, намоз вақтларини аниқлаштиришда кўмакчи бир тақвимдир. Оддий тақвимлардан фарқли ўлароқ унда зуҳо ва таҳажжуд намозлари вақти ҳам берилган. Зеро, бу икки намознинг ҳам улуғлиги ва фазилатли экани ҳадисларда таъкидланган. Эслатиб ўтамиз: намоз вақтлари шаҳардан шаҳарга фарқ қилади. Шунинг учун дастурнинг «Созлаш» саҳифасида манзилингизнинг аниқлигига амин бўлинг.
Ҳар бир кун сана берилар экан, ўша кунда рўза тутиш фарз, суннат ёки аксинча ман этилгани қайд қилинган. Шунингдек, байрамларимиз ва алоҳида аҳамиятли кунларни ҳам белгилаб ўтдик . Ўша кунга тегишли ҳадислар ва маълумотлар келтирилган. Улар Шайх Муҳаммад Содиқ Муҳаммад Юсуфнинг «Ҳадис ва ҳаёт» номли силсиласидан олинган.
Кундалик ҳар кунги ишларингизни соатлар бўйича тартиблашингиз учун қулай бир ҳолда тузилди. «Кун тартиби» саҳифасида муҳим ишларингизни унутмаслигингиз учун эсламталар қўшишингиз мумкин.
«Харид зарурати» саҳифаси аёлларимиз учун жуда долзарб. Чунки биз ҳамиша ниманидир харид қилишимиз керак бўлади-ю, баъзан бирор нарса унутилади. Умид қиламизки, энди камчиликларга йўл қўйилмайди.
Шунингдек, айни қўлланмада сиз ҳар куни янги таомлар рецептларини ҳам топасиз. Таомларга керакли масаллиқлар юртимизда мавжудлигига аҳамият берилди ва фаслга мослаб танланди.
Яна сиз учун керакли деб ҳисоблаб тавсия этганимиз «Фарзанд тарбияси» рукнидир. Ҳар бир она ўз фарзандининг тарбияли бўлмоғини орзу қилади. Шундай экан, айни борада болалар психологлари, жаҳондаги машҳур педиаторлар тавсиялари, қолаверса, миллий диний анъаналаримиздан келиб чиққан ҳолда ушбу маслаҳатларни жамлашга уриндик.
Аёллар учун ўта муҳим бўлган мавзу, бу – гўзаллик. Сир эмаски, оилаларимизнинг мустаҳкамлиги баъзан аёлларимизнинг ўзларига нисбатан аҳамиятлари бўлишларига, ташқи кўринишларига боғлиқ бўлиб қолади. Айни мақсадни кўзлаб, уй шароитида яхшилашимиз мумкин бўлган жиҳатлар эътиборга олинган ҳолда, керакли маслаҳат ва тавсияларни «Гўзаллик» саҳифасида топасиз.
«Календар» саҳифасида эса ойлик календарни милодий ҳамда хижрий саналар кўринишида тақдим қилдик. Бу саҳифа янги ой чиқиш кунини билишда ҳамда аёлларга хос ҳолатларни белгилаб боришда қўл келади.
Дастурда қўшимча равишда ҳозирги кунда маҳсулотларда учрайдиган зарарли моддалар (E-моддалар) ва кир ювишда кийимлардаги эҳтиёт белгиларининг изоҳларини топасиз.
Азиз муслима опа сингиллар! Қўлингиздаги ушбу кундалик сизу бизга икки дунёда манфаатли бўлишини сўраймиз. Агар саҳву хатолар учраса, узр сўраймиз. Маъқул келган жиҳатлари учун эса дуоларингиздан умидвормиз!
Юклаб олиш учун ҳавола: https://play.google.com/store/apps/details?id=com.alkhorazmiy.muslimakundaligi
muslimaat.uz
